2022an, Arantzazulab gizarte berrikuntzako laborategiaren “Lurraldeko lankidetzazko gobernantzaren” egitasmoaren baitan, Gipuzkoan lankidetzazko gobernantzak dituen erronka eta aukeren lanketa egin da, modu kualitatiboak erabiliz. Egitasmoa Gipuzkoako Foru Aldundiko Gobernantza Sailak eta Arantzazulab-ek sustatzen dute, Etorkizuna Eraikiz estrategiaren baitan eta Udal Etorkizuna Eraikiz proiektuaren markoan.
Etorkizuna Eraikizek honela definitzen du Lankidetzazko Gobernantza: “Lankidetzazko Gobernantza erakunde publiko, gizarte eragile eta herritarren artean instituzionalizatutako lankidetza da, herri politiken ekosistema ahaldundu eta eraginkortzeko; hau erakundeen, gizarte eragileen eta herritarren arteko gizarte kapitala sendotuz egin behar da, deliberazio eta ekintza partekatuaren bidez.”
Ekimenaren helburu espezifikoak honako hauek izan dira:
- Egun lurraldean daukagun gobernantza ereduaren egoera eta abiapuntuko argazkia lortu.
- Gobernantza ereduaren eta bere bilakaeraren egoera eta oinarria emango digun tresna dinamikoa proposatu (denboran zehar elikatzen eta osatzen joango den erraminta “bizia”).
- Lurraldean Lankidetzazko Gobernantza eredua hedatzeko erronka eta aukerak identifikatu.
- Ekosistema horretan eragiteko eta lurraldean Lankidetzazko Gobernantza indartzeko herri politikak edo foru estrategiak bideratzeko lehentasunak identifikatu eta horietan eragin.
- Deliberazio prozesuaren bitartez azterketa hori aberastu: Kultura Politiko Berriaren (KPB) Think Tank-etik ekosistema horretan eragiteko ezagutza, diskurtsoak eta metodologiak sortu.
- Helburu hauek lortzen lagunduko diguten eragileak identifikatu eta ekosistemara erakarri (ezagutza eragileak, adituak, arituak, …).
Azterlanean 88 udalekin egin da harremana, eta horietako 31 elkarrizketatu dira. Bestalde, garapen agentzia eta gobernantzaren berirkuntzan dabiltzan ezagutza eragileekin osatu da eremu-ikerketa.
Lankidetzazko gobernantza ezaugarritzen duten irizpideetatik abiatuta, bakoitzaren inguruko egoera deskribatu da, bakoitzaren indarguneak eta ahuleziak azaleraziz.